ആര്യൻ എന്ന വാക്കിനർഥം കൂലിനമയുള്ളവൻ (Noble) എന്നാണ്.
ആര്യന്മാരുടെ ജന്മദേശത്തെക്കുറിച്ചു പണ്ഡിതന്മാരുടെ ഇടയിൽ രൂക്ഷമായ അഭിപ്രായവ്യത്യാസമുണ്ട്.
ആര്യൻമാർ ഇന്ത്യയിൽത്തന്നെ ജനിച്ചുവളർന്നവരാണെന്നാണ് എ.സി. ദാസ് മുതലായവരുടെ സിദ്ധാന്തം; ഇതിനു പൊതുവേ അംഗീകാരം ലഭിച്ചിട്ടില്ല.
ചരിത്രകാരന്മാരിൽ ഭൂരിപക്ഷംപേരും ആര്യന്മാർ വിദേശങ്ങളിൽനിന്നു വന്ന് ഇവിടെ കുടിയേറിപ്പാർത്തവരാണെന്ന് അഭിപ്രായപ്പെടുന്നു.
പക്ഷേ, അവർ ഏതു ദേശത്തുനിന്നുവന്നു എന്ന കാര്യത്തിൽ അഭിപ്രായൈക്യമില്ല.
ബാലഗംഗാധരതിലകൻ്റെ അഭിപ്രായത്തിൽ ധ്രുവപ്രദേശമായിരുന്നു ആര്യന്മാരുടെ ജന്മദേശം. (Arctic Region)
കൂടാതെ, ഹംഗറി, ജർമ്മനി, ഉത്തര ഫ്രാൻസ്‌ മുതൽ യുറാൽ പർവതങ്ങൾവരെ നീണ്ടുകിടക്കുന്ന യൂറോപ്പിലെ സമതലം കരിങ്കടലിനു വടക്കുള്ള പ്രദേശം എന്നിങ്ങനെ പല ഭൂവിഭാഗങ്ങളും ആര്യന്മാരുടെ ജന്മദേശമായി കല്‌പിച്ചുകൊണ്ടുള്ള സിദ്ധാന്തങ്ങൾ ഉണ്ടായിട്ടുണ്ട്.
Prof. മക്ഡാണലിന്റെ നിഗമനത്തിൽ ആസ്‌ട്രോ -ഹംഗറിയൻ (തെക്ക് കിഴക്കൻ യൂറോപ്പ്) പ്രദേശമാണ് ആര്യൻമാരുടെ സ്വാദേശം
ഡോ.എ.സി. ദാസിൻ്റെ അഭിപ്രായത്തിൽ സപ്ത സിന്ധു പ്രദേശമാണ് ആര്യൻമാരുടെ ജന്മദേശം.
ആര്യൻമാരുടെ പ്രദേശം പശ്ചിമ സൈബീരിയ എന്ന് അഭിപ്രായപ്പെട്ടത് മോർഗൻ ആണ്.
ഗംഗനാഥ് ജാ അഭിപ്രായപ്പെടുന്നത് ആര്യൻമാരുടെ സ്വദേശം ബ്രഹ്മർഷി ദേശം എന്നാണ്.
മധ്യദേശം അഥവാ ആധുനിക ഉത്തർപ്രദേശാണ് ആര്യൻമാരുടെ സ്വന്തം നാട് എന്ന് അഭിപ്രായപ്പെട്ടത് രാജ്ബലി പാണ്‌ഡെ ആണ്.
ഇപ്പോൾ പൊതുവേ സ്വീകരിക്കപ്പെട്ടിട്ടുള്ളത് ആര്യന്മാർ മദ്ധ്യേഷ്യയിൽ ജനിച്ചു വളർന്നുവെന്നും അവർ അവിടെനിന്നു പുറപ്പെട്ട് ബാക്ട്രിയ, ഇറാൻ എന്നീ പ്രദേശങ്ങൾ കടന്ന് ഇന്ത്യയിൽ കുടിയേറിപ്പാർത്തുവെന്നുമാണ്.
പ്രശസ്ത ജർമ്മൻ പണ്ഡിതനായ മാക്‌സ് മുള്ളറാണ് പ്രധാനമായും ഈ സിദ്ധാന്തം പ്രചരിപ്പിച്ചത്.
